2018-imi inuusuttunut ilinniarfiit

Saqqummersitami uani Kalaallit Nunaanni inuusuttuaqqanut ilinniarfinni ilinniartut taamaallaat eqqartorneqarput. Inuusuttut nunani allani ilinniarfianni ilinniartut pillugit paasissutissat Naatsorsueqqissaartarfiup Kisitsisaataasivianut aaneqarsinnaapput.

 

2018-imi inuusuttut ilinniarfianni ilinniarlutik naammassisut ikinnerusut

2018-imi inuusuttut ilinniarfianni ilinniarlutik naammassisut 666-iupput. Ukiuni kingullerni inuusuttut ilinniarfianni ilinniarlutik naammassisut amerlatsikkiartuinnarsimagaluarput 2017-imili 12 pct.-imik siullermeerlutik ikilisimallutik. 2017-imiit 2018-imut ilinniarlutik naammassisut ikileqqipput tamatumuuna 6 pct.-imik. 2005-imiit inuusuttut ilinniarfiini naammassisimasut 67 pct.-inik amerlatsissimapput naak ukiuni kingullerni naammassisut ikiligaluartut.

 

Titartagaq 1. 2005-imiit 2018-imut Kalaallit Nunaanni inuusuttut ilinniarfianni ilinniarlutik naammassisut

Najoqqutaq: Naatsorsueqqissaartarfik – Kisitsisaataasivimmi kisitsit takukkit (http://bank.stat.gl/UDNISC11D).

 

2018-imi appariaat annerpaaq ilinniarnertuunngorniarfinniippoq, ilinniarnertuunngorniarfinni ilinniakkamik naammassinnissimasut amerlassusaat 8 pct.-inik appariaateqarluni. 2018-imi ilinniarnertuunngorniarfinni ilinniakkamik naammassisut 273-iupput, 2005-imut sanilliullugu 92 pct.-inik ilinniarnertuunngorsimasut qaffariaateqarput.

 

2018-imi inuussutissarsiornermik ilinniarfinni naammassisut aamma ikilipput. 2015-imi inuussutissarsiornermik ilinniarfinni ilinniarlutik naammassisut amerlassusaasa qaffasinnerpaaffitsik tikippaat, 2018-imi inuussutissarsiornermik ilinniarlutik naammassisunut 2015-imut sanilliullugit 11 pct.-inik appariaateqarput. 2018-imi inuussutissarsiornermik ilinniarlutik naammassisut 393-iupput. Taakku 2005-imut sanilliullugit 53 pct.-inik qaffariaateqarput.

 

Inuusuttunut ilinniarfinni ilinniarnermik aallussisut amerlassusaat nikinngillat

2018-imi Kalaallit Nunaanni ilinniartut 2.179-iupput, tamanna 2017-imitut qaffasitsigaaq. Inuusuttunut ilinniarfinni ilinniartut aamma inuussutissarsiornermik ilinniartut 2 pct.-imik aamma 1 pct.-imik qaffariaateqalaarput. 2011-imi ilinniartunut sanilliullugu 2018-imi inuussutissarsiornermik ilinniartut 274-inik tassa 11 pct.-inik appasinnerupput. Ilinniarnertuunngorniarfinni ilinniartut aamma inuussutissarsiornermik ilinniartut amerlaqatigiipajaaginnarput.

 

Inuussutissarsiornermik ilinniarfinni ilinnialersut ikileriarput ilinniarnertuunngorniarfinni ilinnialersut amerlatsittut

2018-imi inuusuttut ilinniarfianni ilinnialerlutik aallartittut[1] 1.215-iupput, 2016-imut sanilliutissagaanni inuusuttut ilinniarfianni ilinnialersut 2 pct.-inik appariaateqarput, inuussutissarsiornermik ilinnialersut 2016-imi aatsaat taamak amerlatigisimapput. Ilinniarnertuunngorniarlutik aallartittut 4 pct.-imik amerlatsilaarput inuussutissarsiornermik ilinnialersut 6 pct.-imik ikileriartut.

Ilinniarnertuunngorniarfinni ilinniarlutik aallartittartut agguaqatigiissillugit 20-nik ukioqartarput, inuussutissarsiornermik ilinnialersut 27-ngajannik ukioqartarlutik aallartittartut.

 

Titartagaq 2. 2005-imiit 2018-imut Kalaallit Nunaanni ilinniakkamik aallaartitsisartut

Najoqqutaq: Naatsorsueqqissaartarfik – Kisitsisaataasivimmi kisitsisit takukkit (http://bank.stat.gl/UDNISC11A).

 

Tamakkiisumik isigalugu

 

Tabeli 1. 2014-imiit 2018-imut inuusuttut ilinniarfiini ilinniartut ilinniagaqarfiit suussusaanut aamma naatsorsuutit inerneranut immikkoortillugit

	2014	2015	2016	2017	2018
Ilinniarnertuunngorniarfiit
Aallartittut .................	576	513	466	456	475
Aallussisut .................	1227	1206	1099	1076	1094
Naammassisut .............	373	346	370	298	273
Inuussutissarsiutitigut ilinniarfiit
Aallartittut .................	736	735	824	784	740
Aallussisut .................	1145	1097	1097	1070	1085
Naammassisut ..........	403	443	433	407	393

Najoqqutaq: Naatsorsueqqissaartarfik – Kisitsisaataasivimmi kisitsisit takukkit (http://bank.stat.gl/UDNISC11A, http://bank.stat.gl/UDNISC11B, http://bank.stat.gl/UDNISC11D)